يتم التشغيل بواسطة Blogger.
Tag:

قصائد للشاعر المصري الكبير : أحمد فؤاد نجم


   نفسى فى صنف حشيش


نفسى فى صنف حشيش 
ينمل الدماغ وينضف النخاشيش 
علشان انسى طابور العيش 
واخش فى الغيبوبه 
وانسى مشكلة الانبوبه 
وانسى بلدنا المنهوبه 
وانسى اللى بيجهزوه علشان يبقى رئيس للمخروبه 
وابقى مسطول وانسى اى مسئول 
من اللى سابوا الناس فى السيول 
وانسى ان نظيف اتجوز وبقى بيعول 
وانسى مجلس الشعب وفتحى سرور 
وانسى البرادعى وايمن نور
وانسى شوبير ومرتضى منصور 
وانسى تعديل الدستور 
وانسى اللى ساكنين فى القبور 
وانسى انفلونزا الطيور 
وانسى مشاريعنا الفاشله فى توشكى وابو طرطور 
واخش فى الاستهبال وانسى علاء وجمال 
وانسى التوريث و النيل اللى نازلين فيه تلويث
وانسى ان منتخبنا كويس زى ماقال الريس
وانسى تصدير الغاز واحناعندنا ازمة بوتاجاز 
وانسى قطر العياط وانسى قطر الصعيد 
وانسى احمد عز واحتكار الحديد 
وانسى زحمة المواصلات وانسى الانتخابات 
وانسى فتاوى الفضائيات وانسى العشوائيات 
وانسى فشل التعليم وانسى هشام طلعت وسوزان تميم 
وانسى الاهرام وانسى الاخبار وانسى ثروة الريس ال40 مليار 
اللى مش بالجنيه المعفن لا بالدولار 
وانسى انه خلى بلدنا افقر من زنزبار 
وانسى المعارضه وانسى الاحزاب وانسى تامر حسنى وعمر دياب
وانسى مشكلة النقاب وانسى ارضاع الكبير وشرب بول البعير 
وانسى انفلونزا الخنازير 
وانسى اوربا وامريكا وانسى الصين المتقدمين عننا بسنين 
وانسى البيت بيتك و تامر امين وانسى ان كيلو اللحمه بقى بتمانين
وانسى اننا فى الزباله غرقانين وانسى الماده سته وسبعين والماده سبعه وسبعين وانسى فريق الساجدين
وانسى الزمالك والاهلى وانسى اليسا وهيفاء وهبى 
وانسى الفول والطعميه وازهى عصور الديموقراطيه 
وجامعة الدول العربيه والجماهيريه الليبيه والكفيل فى السعوديه 
وانسى بطرس غالى و الضريبه العقاريه 
وانسى الطلعه الاولى الجويه والمصالحه الفلسطينيه 
وانسى فتح وانسى حماس وانسى هنيه ومحمود عباس 
وانسى العراق وافغانستان وانسى ايران و انسى باكستان 
وانسى ماما سوزان وانسى الاخوان 
وانسى محمد ابراهيم سليمان 
وانسى ان حد من 0900 يطلع كسبان 
وانسى انى مديون 
وانسى كل ممثله حيزبون بتاخد فى المسلسل كام مليون
وانسى ايامنا السوده واحضان طنطاوى والبابا شنوده
وانسى القذافى والبشير وانسى كل ملك وكل امير اللى حاكمين من سنين من غير تغيير وعلشان اعرف ان الصنف كويس لازم ارشح نفسى وابقى الريس 
******************************************************
راجل ابن راجل 
أحدث ما كتب الشاعر أحمد فؤاد نجم 


قصيدة : راجل ابن راجل
الجحش قال للحمار *** يابا اديني الحنطور

ياباإنت سنّك كبر *** و وَجَب عليّا الدور

كَـحّ الحمار كَـحة *** فزعِت لها الركاب

مش يابني بالصحة *** ده كل شئ بحساب

و سواقة الحنطور *** محتاجة حدّ حكيم

و إنت عينيك فارغة *** همّك على البرسيم

قوللي تسوق إزاي *** و التبن مالي عينيك

ده حتى حبل اللجام *** واسع يا إبني عليك

إعقل و بطّل طمع *** لا تسخّن الركاب
ماتجيش يا واد جنبهم *** لا تبقى ليلة هباب

دول صنف ناس جبّار *** قادر مالوهش أمان


يبان عليهم وَهَن *** لكنهم فرسان

يابا دا نومهم تِقِل *** و بقالُه يابا سنين
كل البشر صحصحوا *** و لسه دول نايمين

يا جحش بطّل هبل *** و بلاش تعيش مغرور

رُكابنا مش أغبيا *** ولا عضمهم مكسور

بُكرة حيصحولك *** و يزلزلوا الحنطور

و تلاقي في قفاك *** تمانين خازوق محشور

 

***********************************************

 جديد أحمد فؤاد نجم للرئيس مبارك

نؤيد سيادتك لفترة جديدة 
نكمل خلالها المسيرة السعيدة 
و بالمرة فيها نبيع الحديدة 
مفيش حاجة تانية نبيعها خلاص 
نؤيد سيادتك لأجل المزيد 
من اللي تحقق بفضلك أكيد 
بقينا خلاص ع الحميد المجيد 
و ربك لوحده فى ايده الخلاص 
نبايع سيادته ولا حد غيره 
كفايا علينا نبرطع في خيره 
ونوم شعب مصر العظيمة و شخيره 
يقول للحرامي ما تسرق كمان 


نبايع سيادته وابنه وحفيده 
مفيش زي فكره قديمه و جديده 
خرابك يا مالطة حيحصل بايده 
ومين فيكي يعني بيسمع آذان 

نبوس ايد سيادتك و رجلك كمان 
تخليك معانا يا ريس عشان 
وجودك ضرورة فرضها الزمان 
و من غير وجودك حقيقي نضيع 
دي مصر بتاعتك واحنا ضيوفك 
كفايا علينا يا ريس نشوفك 
و عاذرين سيادتك و فاهمين ظروفك 
عليك بس تؤمر واحنا نطيع 
في جزمة سيادتك كلابك يبوسوا 
و فوق الغلابة بجزمهم يدوسوا 
و شعبك ليلاتي يا ريس غموسه 
مذلة و مهانة و حوجة و مر 


لكن يعني ما دمنا شعب انتساب 
و دايما وأبدا فى حالة غياب 
متعملش لينا ياريس حساب 
دي عزبة سيادتك وفيها أنت حر 
و دستور ما دستورشى مش فارقة خالص 
كلام فاضي كله يا فندم بناقص 
كفايا علينا الفساد اللي ماصص 
عرقنا و معشش وضارب جذوره 
و ايه يعني تهري جتتنا البلاوي 
يوماتي كوارث، فضايح، رشاوي 
كفايا علينا القعاد في القهاوي 
بنستنى لما الوريث ييجي دوره
 


***********************************************************
 كأنك مفيش ..

برغم إن صورك فـ كل الدواير
وكل المداخل وكل المحاور
ومليا الشوارع على كل حيط ..
مطنش علينا وعامل عبيط ..
كأنك مفيش ..
***
يا فرحة قلوبنا رئيسنا ظريف ..
فُكهي ..
إبن نكته ودمه خفيف
فـ عهدك سيادتك فَرَشنا الرصيف
وآخر مُنانا الغُموس والرغيف
وكل أمَّا تُخنُق ندوَّر ..
مفيش !!

***
مسيِّب علينا عصابة حبايبك
فضايح وسرقة ونهب بسبايبك
مابين حزب نجلك .. وهانم جلالتك
وجيش الغوازي إللَّي داير يجاملك
وناملك وقاملك .. وحارسك وأمنك
شبعنا مهانه .. شبعنا لطيش ..!
وأنت .. مفيش !!
***
باعونا فـ حضورك ..
ببركة عِبـيدك وغالي وسرورك
باعوا الأراضي .. وكل المصانع
وباعوا البنوك ..
وقدَّام عِنيك .. صوتنا إتـنبح ..
ننادي عليك ..
إلحق يا ريس : ده باعوا الحديد !!
وأنت منشِّف دماغك عنيد !!
.. كأنك مفيش !!
***
دوشتوا دماغنا ” بجمال ” طلعتك
ومن يومها وإحنا عَبـيد حضرتك
ما تزعلش إني مواطن أبيح
ورافض كلابك فـ شعبك تطيح
فسادهم يا ريِّس واضح .. صريح
قوم بينا صلّح وفتَّش .. وثور
ح نكتب تاريخك ياريِّس بنور
مش تبقى عايش كأنـَّك مفيش !!
***
ورحمة أبوك .. مادام أنت قاعد
عيب لمَّا عُصبة نَـوََر يسحبُوك
م تُقبض عليهم .. م تقطع إيديهم ..
م تعمل عليهم يا ريِّس شاويش
بدل م انت ساكت وقاعد مفيش
***
ياريس علىّ الطلاق تعبانين !!
ياريس علىّ الحرام كفرانين !!
صبرنا سنين ..
سيادتك مسلطن
وشعبك وناسك بتاكل مسرطن
وتشرب مجاري وميت سم هاري ..
ومش دريانين !!
ما تنهض يا ريس تلم الديابه ؟!!
ده شعبك غلابه ..
ومليان طيابه ..
وهوَّ الشفاعة ف يوم الحساب
وهما البطانة الحُثاله الكلاب
ما يملاش عنيهم غير التراب
وليهم ضوافر
وميت ألف ناب
وواقفين لشعبك ورا كل باب
لإمتى ح تسكت وليه الغياب ؟
ده ياما ممالك طواها التراب
حياتنا ياريس تعب فوق عذاب
يا ريس ” شريفك ” ماهوَّاش شريف !!
” نظيفك ” يا ريس ماهوَّاش نظيف !!
وحتى ” حبيبك ” ماهواش حبـيب !!
وأنا غصب عني .. خلاص إستويت ..
بـ غـُلبي إنحنيت ..
وطلعان عنيا .. وصعبان عليا
بحسبة بسيطة ومن غير خريطه ..
وكونك مفيش .. لقيت متساويش
ومش فارقه أعيش ..
نويت أشتكيك للِّي فوقي وفوقك
وأصلي الفرايض ..عسى يفـُك طُوقـك
قالولي إللي يسجد عدو النظام !!
حاولت أحكي حالي ..!!
قالولي الحكاوي نميمة وحرام !!
فكرت أكتب ..
لقيتكم سيادتك منعتوا الكلام !!
فقررت أحلم ..
هاحلم سيادتك وأفُك اللِّجام
ولو مش هيعجب سيادتك يا فندم
وصِّي العساكر .. تاخُدني أمَّا انام !!
***
حلمت إني شعب ..!
حلمت إني شعب ومصلوب بطولي
على أرض سمرا
ودمي بينـزف ومليان جروح
وفوق صدري جمرة
يميني مربّط على أرض طابا
شمالي ممسمر فـ “أولاد علي”
ورجلي على جزع نخلة فـ “حلايب”
ومرتاح براسي على حِجْر مصر
وشوفتك ياريس ..كأنك ولي ..
كأنك نبي ..
فـ إيدك عصاية وليك معجزات

وانا فـ جنَّه خضره .. وتحتي جداول ..
ومن فوقي نور .. وريحة بخور ..
همست ف ودانك بآخر وصيّة :
إنسى إللي فاتك ..
هننسى الأسية .. !!
أمانه عليك ..
حُط الوطن جُوَّه نِنِّي عينيك
كرامة عيالنا أمانة ف إيديك
بحق إللي بينّا يا ريِّس وبـينك
وحَق اليَمِين و” الكتاب ” فى يمينك
بحق الشهيد .. إللي رافع جبينك
وجيش إنتصارك فى يوم العبور
وجيل حُر طالع .. وعدته بدور
لملم عيالك .. وجمَّع فـ مالك
وإسحب ” جمالك ” وسيبنا وغور

 
*********************************************************************
 أنا مصرى أبن مصرى وليا الشرف

شعبيات عم أحمد فواد نجم

أنا مصرى

أنا مصرى أبن مصرى وليا الشرف 
برغم المهانة برغـــــــــــــــم القرف 
برغم الزبالة اللى مالية الشــــــوارع 
برغم الفســـــــــــاد اللى بيه أعترف 
سمو معـــــــــــــــالى رئيس الوزارة 
نتيجة موظف بسيـــــــــــــط أنحرف 
برغم المجاعة اللى داخلين عليهــــــا 
وفينا اللى عـــــــايش حياته فى ترف 
برغم البطــــــــالة فى أوضة وصالة 
برغم أن أخر جنيـــــــــــــه اتصرف 
برغم طـــــــــــابور الصباح السخيف 
وكل منايا يادوب كــــــــــــــام رغيف 
برغم أسايـــــــــا لمنظر عشايـــــــــــا 
وأقول مش مهم يــــــــــا واد نام خفيف 
برغم إنى شايف بــــــــــلاوى وساكت 
وعايش مطنش كـــــــــــــــــأنى كفيف 
برغم وزارة رئيسهـــــــــــــــا حرامي 
وشوفوا البجاحـــــــــــــة يقولوا نظيف 
برغم الســـــــــــلام اللى غرقت بناسها 
برغم العيـــــــال اللى ساكنة الرصيف 
برغم حكومة شعـــــــــــــارها الكلام 
ورغم رئيسنــــــــــــــــا عليه السلام 
ورغم أن كله يــــــــــــــا عالم بيغلى 
إلا كرامتى بترخص قــــــــــــــــوام 
برغــــــم إنى عايش في بلدى فريسة 
ووجبة شهية لبعض اللئـــــــــــــــــام 
برغم أن كـــــــــــــل تاريخك يا بلدى 
فعهد جنابه كـــــــــــــلام فوق رخام 
برغم ده كله يــــــــــــا مصر بحبك 
وطظ فيهم ودا آخر كلام 

 
*******************************************************
             سيدى الرئيس في عيد ميلادك الكام وسبعين 
كل سنة وانت طيب 
واحنا مش طيبين 
كل سنة وانت حاكم 
واحنا محكومين 
واحنا مظلومين 
واحنا متهانين
وانت راكب واحنا مركوبين
ويا تري يا حبيب الملايين 
فاكرنا ولا احنا خلاص منسيين 
فاكر المعتقلين 
فاكر الجعانين 
فاكر المشردين 
فاكر اللي ماتو محروقين 
فاكر الغرقانين 
الله يكون في عونك - ها تفتكر مين وللا مين 
في عيد ميلادك الكام وسبعين 
بقول لك كلمتين

الأوله

شيلتنا طين 
وهل تعلم أن النيل بقي رشاح 
والجو أصبح بيئة والعيشة ولعة 
والشرفا قلوبهم عالبلد والعة 
وانت عاملهم مذبحة ولا بتاعة القلعة 
والإقتصاد سداح 
والسرقة بقت كفاح 
ومصر متاحة بس للسياح 
وعرض البلد بقي مستباح

والثانية

ورتنا الويل 
داالخطوة في عهدك بقت ميل 
والضحك بقي نواح و عويل 
والكوسة 
عارف الكوسة 
ممكن أقول لك فيها مواويل 
والجامعة بقت يا إما كباريه أو دار مسنين 
والشباب معظمهم من غير خمرة سكرانين 
والعلم عز علي المتعلمين 
والأساتذة بقم دجالين 
والقادة بقم طبالين 
واديني في الهايف يا حبيب الملايين

والثالثة

عارف اليابانيين 
زمان في سنة اتنين و خمسين 
كان عندنا تروماي و كان عندنا علم و متعلمين 
وثقافة ومثقفين 
وأدبا وعلما وفنانين 
وكانو اليابانيين 
بالنووي لسه مضروبين 
و للصدقة مستحقين 
دلوقتي إحنا فين و هما فين 
هما فوق و احنا في أسفل سافلين

والرابعة

أمن بلدنا بقي تنين 
والمحاكم اتملت مظالم 
والعدالة بقت كمالة 
وكلمة الحق في الزبالة 
وأصحابها في الزنازين

والخامسة

القطاع العام....عام 
والفساد.....ساد 
وفي جتة بلدنا بيرعي 
أفتكر لجنابك إيه و للا إيه 
وكل ذكري ليك بدمعة 
آآآآآآآآه 
آآآآآآآآه 
أنا كنت حالف ميت يمين 
أكملهم لك تمنية و سبعين 
بس ها كفيهم ورق منين

و كل سنة و انت واحنا طيبين ............ 
 
**************************************************************

             طاطي راسك 
انت ف وطن ديمقراطـــــــي
انت بتنـــعــــم بالحــــــــــرية
بس بشرط تكون مطاطــــــي

لما تكون شغــال بذمــــــــــة
خايف على مصــلحة الأمــة
شغلك يطلع من غير لازمــة
علشان مبيعلاش غير واطي
طاطي راسك طاطي طاطـــي
انت ف وطن ديمـــــقراطي

لما حاميها يكون حراميــها
وبلاده ورا ضهره رامـيـها
طالع نازل واكل فيـــــــــها
مسنود بالبدلة الظباطــــي
طاطي راسك طاطي طاطـــي
انت ف وطن ديمـــــقراطي

لما شــقاك يصــبح مش ليك
فقرك سد السكة علــــــــــيك
تتلفّت تلــــقى
 حـــوالـــــــيك  
إما حرامي و إما عقــــاطي
طاطي راسك طاطي طاطــــي
انت ف وطن ديمقراطـــــــي

لماتلاقي بـــــلاد الـدنـيـــــــا
فيها البني آدم حــــاجة تانية
وانت في الطبقات الـــــــدنيا
قرد مسلسل أو وطواطــــي
طاطي راسك طاطي طاطـــي
انت ف وطن ديمقراطــــــي

لما الجهلة يبــــــقوا أمــامــك
أو فوقك ماسكــين ف زمامك
ويسوقك ع الهــلكة إمامك
تشرب م السم السقـــــراطي
طاطي راسك طاطــــي طاطي
انت ف وطن ديمقـــــــراطي


لمــــا الكلـــمة تكون بتدينـك
لما تخبي ف قلـــــــبك دينــك
لما الذل أشوفه ف عيـــــــنك
هات إحباطك على إحباطــــي
طاطي راسك طاطي طاطـــي
انت ف وطن ديمقراطــــــي
انت ف وطن ديمقراطـــــــي
*********************************************************          
    حرنكش

عليا الحرنكش ياريس مبارك
فى عصر مزركش ملون بنارك
لابايعك وابايع حكومة حمارك
ملعون ابو اللى يقدر يقاطع قرارك
نهاره مقندل وليله مبارك
فهمبك وهجص وطلع فى ديننا
اكيد هو طالع يشاهد جمالك
جمالك مبارك
سوزانك سوزاننا
يامحلا حصارك لمصر اللى جالنا
نسيمها فى عصرك بيشوى فى بدننا
اؤيد وابايع فخامة جلالتك
وايد اى واحد بيمسح ريالتك
ولانك سر باتع هاننسى هبالتك
فاقعد ياريس ودلدل حمامتك
حمامة السلام حمامتك ياريس
سلامة الحمامة وسلامتك ياريس
على تل مصر ياريتك تهيص
خرابه فسيحة عليها تمتيس
واامر تطاع فشعبك مفيص


 



 جيفارا مات
شعر : أحمد فؤاد نجم
غناء : الشيخ إمام
-------------------------------------
جيفارا مات
جيفارا مات
آخر خبر فِ الراديوهات
و فِ الكنايس
و الجوامع
و فِ الحواري
و الشوارع
و عَ القهاوي و َ البارات
جيفارا مات
جيفارا مات
و اتمد حبل الداردشة و التعليقات
********
مات المناضل المثال
يا ميت خسارة عَ الرجال
مات الجدع فوق مدفعه جوّه الغابات
جسّد نضاله بمصرعه
و من سُكات
لا طبالين يفرقعوا
و لا اعلانات

  • ********
    ما رأيكم دام عزكم
    يا انتيكات
    يا غرقانين
    فِ المأكولات و الملبوسات
    يا دفيانين
    و مولعين الدفايات
    يا محفلطين (1)
    يا ملمّعين يا جيمسنات
    يا بتوع نضال آخر زمن
    ف العوامات
    ما رأيكم دام عزّكم
    جيفارا مات
    لا طنطنة
    و لا شنشنة
    و لا إعلامات و استعلامات
    عيني عليه ساعة القضا
    من غير رفاقه تودّعه
    يطلع أنينه للفضا
    يزعق و لا مين يسمعه
    يمكن صرخ من الألم
    من لسعة النار فِ الحشا
    يمكن ضحك
    أو ابتسم
    أو ارتعش
    أو انتشى
    يمكن لفظ آخر نفس كلمة وداع
    لَجل الجياع (2)
    يمكن وصية للي حاضنين القضية
    بالصراع
    صور كتير ملو الخيال
    و ألف مليون إحتمال
    لكن أكيد و لا جدال
    جيفارا مات موتة رجال

  • *******
    يا شغالين و محرومين
    يا مسلسلين (3)
    رجلين و راس
    خلاص خلاص
    مالكوش خلاص
    غير البنادق و الرصاص
    دا منطق العصر سعيد
    عصر الزنوج و الامريكان
    الكلمة للنار و الحديد
    و العدل أخرس أو جبان
    صرخة جيفارا يا عبيد
    في أي موطن أو مكان
    ما فيش بديل
    ما فبش مناص
    يا تجهّزو جيش الخلاص
    يا تقولو عَ العالم
    خلاص

    1968
    ---------------------------------------
    (1) محفلطين : متأنقين
    (2) لجل : من أجل
    (3) مسلسلين : مربوطين بالسلاسل

=====================================================================


سقطت سايغون (1)
كلمات : أحمد فؤاد نجم
غناء : الشيخ إمام

أبجد هوز .. حطي كلمن
إقلب صفحة .. امسك قلم ٌ
اكتب زي الناس ما بتنطق
سقطت سايغون رفعوا العلم ٌ
..........
طلعت شمس اليوم ده أغاني
كل ما نسمع نعشق تاني
طلعت شمس اليوم ده حريقة
تكوي الجرح و تبري الالم ٌ
.....
سايغون عادت للثوار
فوق الدم و تحت النار
جدّوا فوجدوا .. زرعوا فحصدوا
و إحنا إيدينا للسمسار
و إللي قالوه السمسارجية
و اللي حكاه السمساردار
لما قروه القرونجية
بالمستعجل و المندار

هشت و نشت يعزم الصوت
عن أمريكا و هول أمريكا
زعموا الفانتوم حامل موت
سقط الكوت بعلم أمريكا
جاتكو فضيحة يا طبقة سطيحة
و عاملة فصيحة و جايبة العار
فصحانجية و كلمانجية و سمسارجية
و سمسار دار





يا عرب ( باللهجة المصرية )
كلمات الشاعر المصري أحمد فؤاد نجم .. و غناء الشيخ إمام
يا عرب .. يا عرب .. يا عرب في أي مصر
يا عرب .. يا عرب .. اسمعوا صوت شعب مصر
أحفظوا لمصر المكان .. و احنا عالعهد اللي كان
مصر أوفى من الزمان ..
و انتو عارفين شعب مصر
يا عرب يا عرب يا أهل مصر
----------------------------
اللي خانوا العهد بينا .. و استباحوا كل حاجة
و استهانوا بالعروبة .. و استكانوا للخواجة
مستحيل حيكونوا منا .. نحنا حاجة و هما حاجة
هما باعوا الجلابية .. و الوطن و البندقية
و ا حنا أصحاب القضية ..
احنا ما بنبيعش مصر
يا عرب يا عرب يا أهل مصر
----------------------------
يطلع الدجال بزيفو .. يملا وادي النيل ضباب
ينزل الجلاد بسيفو ... يزرع الموت و الخراب
يطول الليل زي كيفو .... الصباح له ألف باب
و احنا بوصلتنا بإيدينا .. ما تخافوش من الليل علينا
مهما غبتو عن عينينا ..
انتو جوا بقلب مصر
يا عرب يا عرب يا أهل مصر
-------------------------
سينا و لا .. يافا و لا .. حيفا ولا ... دير ياسين
اسألوا الشمس اللي هالة .. عللي صحيوا مبدرين
يزرعوها نور و غلة .. دول جدودنا و لا مين ؟
حقنا و حتما ً يُعاد .. بس لو بانت سعاد
و البيان ده لوه معاد ...
و المعاد حيكون في مصر
يا عرب يا عرب يا أهل مصر




اتجمعوا العشاق  
اتجمعوا العشاق في سجن القلعة ... اتجمعوا العشاق في باب الخلق
و الشمس غنوة من الزنازن طالعة .. و مصر غنوة مفرعة في الحلق
تجمعوا العشاق بالزنزانة .... مهما يطول السجن مهما القهر
مهما يزيد الفجر بالسجانة .. مين اللي يقدر ساعة يحبس مصر
...............
تجمعوا و العشق نار في الدم ..... نار تحرق الجوع و الدموع و الهم
نار تشتعل لما القدم ينضم .... لما الايادي تفور في لم اللحم
و اللحم متنتور في رملة سينا .... و الكدب بيحجز على أيادينا
قدم العدو غارسة في لحم ترابي ... و الكدب عشش مخبرين على بابي
و المخبرين خارجين كلاب سعرانة ... بيجمعوا العشاق في الزنزانة
...............
مصر النهار يطلقنا في الميادين .. مصر البكا .. مصر الغنا و الطين
مصر الشموس الهالة من الزنزانين .. هالة و طارحة بدمنا بسا تين
مصر الجناين طرحة مين يقطفها .. مصر الجناين للي يرفع سيفها
مهما يطول السجن مهما القهر .. مهما يزيد الفجر بالسجانة
مين اللي يقدر ساعة يحبس مصر



غابة
غابة كلابها ديابــــا ... و نازلين في الناس هـم
و اللي ينام في الغابة ... رح يتاكل هــــــــم
و اللي يدور وشـــــو ... في غمضة عين يتهــــــم
و اللي يغيب عن جحرو .. لاجل القوت و المم
يتخان من ورا ظهرو ... او يتاخد خم
غابة بتاكل ميتة ... غابة بتشرب دم
 
غابة كلابها ديابا ... نازلين بالناس هم
غابة و ناسها غلابة .. خيخة لا ناب و لا فم
متكلين عالصدفة .... متاكلين بالهم
 
و احنا يا ملح الغابة .. هم يحرك هم
ضايعين و سط ديابا .. مش فاضيين نهتم
فاهمين و بنتغابا ... مش راضيين نتلم




 برولوج
شعر أحمد فؤاد نجم
----------------------------------------
يا ليل يا عين ما اعرفش اكدب
طب و اكدب ليه
عدم المؤاخذة
لنا باكتب
و لا أبصر إيه
لا انا احترافي اشتراكية
و لا عندي نزعة رجعيّة
لكني شايف بعنيّه
يا فلاحين يا صنايعية
بر الأمان بان
و المركب
راح ترسي عليه
و انا حاكدب ليه
1971




نكسون
شرفت يانكسون بابا يا بتاع الوترغيت
عملولك ايمة وسيمة سلاطين الفول و الزيت
فرشولك اوسع سكة من راس التين على مكة
وهناك تنفد على عكا ويقولوا عليك حجيت
____________________________________
عزموك فقالوا تعالا تاكل بابمبون وهريسة
امت لانك مهيف سدءت انحنا فريسة
هات وشك خودلك تفة طبعا شلا يا صحاب البيت
___________________________________
خد منى كلام يبئالك ولونك موش حتعيش
لاحؤول أهلا ولا جهلا ولاتجى ولا ماتجيش
بيقولوا اللحم المصرى مطرح مابيسرى بيهرى
ودا كولوا من تاثير الكوشرى والفول أبو سوس بزيت




هما مين و إحنا مين ...
كلمات الشاعر : أحمد فؤاد نجم
غناء : الشيخ إمام
هما مين و إ حنا مين .. ؟
هما الأمرا و السلاطين ..
هما المال و الحكم معاهم ..
و إحنا الفقرا المحرومين
حزر فزر شغّـل مخك
شوف مين فينا بيحكم مين ؟!!
..............
إحنا مين و هما مين ..
إحنا الفعلا البنايين
إحنا السنة و إحنا الفرض
إحنا الناس بالطول و العرض
من عافيتنا تقوم الارض ..
و عرقنا يخضر بساتين
حزر فزر شغل مخك
شوف مين فينا بيخدم مين ..؟؟!!
................
هما مين و إحنا مين ؟؟
هما الامرا و السلاطين
هما الفيلا و العربية
و النساوين المتنقية
حيوانات استهلاكية
شغلتهم حشو المصارين
حزر فزر شغل مخك
شوف مين فينا بياكل مين ..؟؟!!!
....................
إحنا مين و هما مين
إحنا قرنفل على ياسمين
إحنا الحرب : حطبها و نارها
و إحنا الجيش اللي يحررها
و إحنا الشهدا بكل مدارها
منكسرين أو منتصرين
حزر فزر شغل مخك
شوف مين فينا بيقتل مين ..؟؟!!!
................
هما مين و إحنا مين
هما الامرا و السلاطين
هما مناظر بالمزيكا
و الزفة و شغل البوليتيكا
و دماغهم طبعاً استيكا
بس البركة بالميازين
حزر .. فزر شغل مخك
شوف مين فينا بيخدع مين ..؟؟؟!!!
.....................
هما مين و إحنا مين
هما الامرا و السلاطين
هما بيلبسوا أخر موضة
و إحنا بنسكن سبعة في أوضة
هما بياكلوا حمام و فراخ
و إحنا الفول دوخنا و داخ
هما بيمشوا بطيارات
و إحنا نموت بالاوتوبيسات
هما حياتهم بامب جميلة
هما فصيلة و إحنا فصيلة
حادي يا بادي يا عبد الهادي
يا اللي عليك قصد الغنوادي ( الغنوة دي أو هذه الاغنية )
لما الشعب يقوم و ينادي
يا إحنا يا هما في الدنيا دي
حزر فزر .. شغل مخك
شوف مين فينا حيغلب مين




دلي الشكارة
دلي الشكارة جنب الشكارة
و اقعد يا حفني ولعلك سيجارة
فكّـر شوية .. بالعيشة دية
إيه القضية إيه العبارة

من صغر سني
شقيان لكني
ما لط سني غير البصارة
....
و دخلت حارة من جوة حارة
و فكل حارة عليت عمارة
و سط المعامل بنا و مناول
بس المقاول كلني بشطارة
و لا خلى صرة و لا لقمة حرة
و العيشة مرة .. أخر مرارة


القواد الفصيح
شعر : أحمد فؤاد نجم
------------------------------
القواد : سلمى يا عزيزة على الأستاذ
فنان اليوم و المستقبل
محمود محمود محمود الباز
بنتي السنيورة الأمورة
على فكرة بترقص ممتاز
ارقصي يا عزيزة ما تنكسفيش
محمد بقى منا خلاص و لا فيش
يا عزيزة النيزة كوا النيزه
كان ممكن تطلعي مركيزة
المطيباتية : تكي تم تكي تم تكي تم تم تم
الرقص النقص
يزيح الهم
تكي تم تكي تم تكي تم تم تم
و يمشي الحال
و يجري الدم
تكي تم تكي تم تكي تم تم تم
****
القواد : على فكره يا كابتن محمود
و برغم الكبت الموجود
انا راجل ثوري و متحرر
و عزيزة بتلعب ع العود
إلعبي يا عزيزة ما تنكسفيش
محمود بقى منا خلاص و لا فيش
يا عزيزة النيزه كوا النيزه
كان لازم تطلعي مركيزه
*****
المطيباتية : ترى لم ترى لم ترى لم لم لم
العود النود
بيزيح الهم
ترى لم ترى لم ترى لم لم لم
و يخلي القعدة
شهية يا عم
ترى لم ترى لم ترى لم لم لم
القواد : أنا رأيي يا سيد محمود
و برغم الصمت المقصود
انك فنان المستقبل
و نشيد العصر المنشود
قربي يا عزيزة من الاستاذ
محمود مبقاش محمود الباز
محمود بقى منا خلاص و لا فيش
قربي يا عزيزة ما تتأخريش
يا عزيزة النيزة
كوا النيزة
انا رأيي
إنك مركيزة
المطيباتية : هلا لم هلا لم هلا لم لم لم
محمود النود
بقى نازل
هم
هلا لم هلا لم هلا لم لم لم
و عزيزة
النيزة
تحب الهم
هلا لم هلا لم هلا لم لم لم




عالمحطة
عالمحطة … عالمحطة
واللي شفته أنا عالمحطة
طلعت الخفة أم شنطة
سلم الأوتوبيس … بنطة
حتة ملعب (بضم الميم ، أي ذات لعب ودلال) … والأكاده (أي بالتأكيد)
في الأوام (القوام) والحسن بطة
هيه خشت درجة أولى
والكراسي بإت (بقت أي أصبحت) منطة
سابوا تانية … وغلب تانية
والأطيع (القطيع) على أولى خطى
اللي يهبش في الجونيلا
واللي يعلى … واللي يوطى
بص واحد ماللي ( من الذين) هما دمهم فلفل وشطة
شاف صنايعي في البريمو
آل له خش هناك يا أسطى
تانية أنسب للي زيك
دي الحقيقة بلاش مغالطة
الأسطى آل له … ياعم روق (بتشديد الواو)
دي الحياة تحب المباسطة
وانت شايف … مش مغمض
حاجة ملبن … حاجة إشطة (قشدة)
والا يعني الكون حيخرب
لو فقير يلهط له لهطة ؟


البحر بيضحك ليه

البحر بيضحك ليه
وانا نازله ادلع املا القلل

البحر غضبان ما بيضحكش
أصل الحكاية ما تضحكش
البحر جرحه ما بيدبلش
وجرحنا ولا عمره دبل

مساكين بنضحك من البلوة
زي الديوك و الروح حلوة
سارقاها من السكين حموة
و لسة جوا القلب أمل
قللنا فخارها إناوي
بتقول حكاوي و غناوي
يا قلة الذل أنا ناوي
ما شرب و لو في المية عسل

والبحر بيضحك ليه … ليه
وانا نازلة ادلع املا القلل

ياما ملينا وملينا
لغيرنا وعطشنا ساقينا
صابرين وبحر ما يروينا
شايلين بدال العلة علل

والبحر بيضحك ليه … ليه
وانا نازلة ادلع املا القلل
   
في بالي ياما وعلى بالي
واللي بيعشق ما يبالي
ما يهمنيش من عزالي
يا حلوة لو مرسالي وصل

والبحر بيضحك ليه ليه
وانا نازلة ادلع املا القلل
   
بيني وبينك سور ورا سور
وانا لا مارد ولا عصفور
في إيدي عود قوال وجسور
وصبحت انا في العشق مثل

والبحر بيضحك ليه
وانا نازله ادلع املا القلل


كلمات : أحمد فؤاد نجم
غناء : الشيخ إمام
............................
كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
..........................
شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إيمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
.....................
قصرك المسحور غيلانو
أغبى من دود  الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجور ملو جوفه
مات بخوفه من الغيلان
طوّع الغلبان
ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِـآمن يمشي فين
....................
أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظلمة
كنت خايف يلمحوها
يقتلوها في سكة ظلمة
سقسقت و النور بشاير بشاير
زهرة الصبار يا سلمى
يا نسيم الشوق يا طاير يا طاير
خد لمصر في الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين


فاليري جيسكار ديستان
والست بتاعه كمان
حيجيب الديب من ديله
ويشبع كل جعان
ياسلاملم يا جدعان
ع الناس الجنتلمان
داحناحنتمنجه واصل
وحتبقى العيشه جنان
التلفزيون حيلون
والجمعيات تتكون
والعربيات حتمون
بدل البنزين برفان
وحتحصل نهضه عظيمه
وحتبقى علينا القيمه
فى المرسح أو فى السيما
أو فى جنينة الحيوان
وحتبقى الأشيا زلابيه
ولاحوجه لسوريا وليبيا
وحنعمل وحده أرابيا
مع لندن والفاتيكان
والفقرا حيكلوا بطاطا
وحيمشوا بكل ألاطه
وبدال ما يسوا شلاطه
حيسموا عبالهم جان
ودا بفضل صديكي ( صديقي)
ديستان الرومنتيكى
ولاحدش فيكو شريكى
فى المسكن والسكان
القاهرة1975





ممنوع من السفر
ممنوع من الغنا
ممنوع من الكلام
ممنوع من الاشتياق
ممنوع من الاستياء
ممنوع من الابتسام
وكل يوم فى حبك
تزيد الممنوعات
وكل يوم باحبك
اكتر من اللى فات
حبيبتى يا سفينه
متشوقه و سجينه
مخبر فى كل عقده
عسكر فى كل مينا
يمنعنى لو أغير
عليكى أو أطير
بحضنك
أوأنام
فى حجرك الوسيع
وقلبك الربيع
اعود كما الرضيع
بحرقة الفطام
حبيبتى يا مدينه
متزوقه وحزينه
فى كل حاره حسره
وف كل قصر زينه
ممنوع من انى اصبح
بعشقك او ابات
ممنوع من المناقشه
ممنوع من السكات
وكل يوم فى حبك
تزيد الممنوعات
وكل يوم بحبك
اكتر من اللى فات

القاهرة /1976




 التحالف
يعيش اهل بلدى
وبينهم مفيش
تعارف
يخلى التحالف يعيش
تعيش كل طايفه
من التانيه خايفه
وتنزل ستاير بداير وشيش
لكن فى الموالد
يا شعبى يا خالد
بنتلم صحبه
ونهتف يعيش
يعيش اهل بلدى
يعيش النثقف على مقهى ريش
يعيش يعيش يعيش
محفلط مزفلط كتير الكلام
عديم الممارسه
عدو الزحام
بكام كلمه فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش اهل بلدى
يعيش التنابله
فى حى الزمالك
وحى الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك
اذا عزت توصف حياتهم
تقول الجياه عندنا
مش كذلك
وممكن تشوفهم فى وسط المدينه
اذا مر جنبك
أتومبيل سفينه
قفاهم عجينه
كروشهم سمينه
جلودهم بتضوى
دماغهم تخينه
سنانهم مبارد تفوت فى الجليد
ما فيش سخن بارد
بيكلوا الحديد
ما دام نهر وارد
وجاى م الصعيد
تزيد الموراد
كروشهم تزيد
وتسمع وتسلم
بأن التنابله
أو الأكلين
حيسمع كبيرهم
ويعمل مقابله
مع الفلاحين
ويحصل تحالف
ما بين الجميع
ونملا المصارف
بدم القطيع
أطيع الخليفه
وأطيع والديك
دا مفروض عليك
تزرع وتبعت لحى الزمالك
وحى الزمالك
مسالك مسالك
تحاول تفكر تهوب هنالك
تودر حياتك بلاش المهالك
لذلك
أذا حد جابلك سيرتهم
تبسمل تكبر
وتهتف كذلك
يغيش التنابله
يعيش يعيش يعيش
يعيش اهل بلدى
يعيش الغلابه
فى طى النجوع
نهارهم سحابه
وليلهم دموع
سواعد هزيله
لكن فيها حيله
تبدر تخضر جفاف الربوع
مكن شغل كايرو
ما يتعبش دايره
لا ياكل
ولا حتى يقدر يجوع
يا غلبان بلدنا
يا فلاح ياصانع
ياشحم السواقى
يا فحم المصانع
يا منتج
يا مبهج
يا آخر حلاوه
يا هادى
يا راضى
يا عاقل
يا قانع
ما تتعبش عقلك
فى شغل السياسه
وشوف انت شغلك
بهمه وحماسه
وعود عيالك فضيلة الرضا
لأن احنا طبعا
عبيد القضا
ورزقك ورزقى ورزق الكلاب
دا موضوع مؤجل ليوم الحساب
كمان الصحافه
جتكتب فى حالتك
وتنشر مناظر لخالك وحالتك
وتتطلع يامسعد عليك الغناوى
وتسمع بأسمك
فى قلب القهاوى
تحبك مشيره وبنات الجزيره
وقصة غرامك
تشيع فى الرداوى
يعيش عم مسعد
يعيش يعيش يعيش
يعيش اهل بلدى القاهرة /1967


ورقه .. من ملف القضية
انت شيوعى
انا مصراوى
انتومصايب
انتو بلاوى
ممكن اعرف مين الأول
بيكلمنى
احنا نيابة أمن الدولة
دولة مين
دولة مصر
مصر العشه
ولآ القصر
أيوه حنبدى ندور ونلف
حاجه تنرفز خالص
اف
مالك.. شايل طاجن خالك
لم لسانك ما تخرفش
أنا ما اقصدش اهانتك طبعا
ايوه استعبط
لا ما اعرفش
ايه رأيك فى سفارة كوريا
ايه رأيك فى قضية مصر
مصر فى وحده
هى وسوريا وليبيا
ولازم ييجى النصر
ييجى منين و ازاى ولمين
آدى كلام الشيوعيين
أنا من حقى
حق فى عينك
أنا بتكلم بينى وبينك
يعنى كلام بره التحقيق
اذا كانش يسبب لك ضيق
طيب فول
مين مسؤل ؟
مين مسؤل عن ايه يا أخينا
ع اللى جرى لنا ف غزه وسينا
أنت شيوعى أكيد وطاوعنى
فض دمغك من دى قضيه
شعبنا جاهل
مهما تقول له
مش حيآمن بالشيوعيه
ما الشيوعيه فى فيتنام
ايه رأيك فيهم يا همام
مش بطال مش بطال
لكن احنا .. ورانا عيال
طب ما نحارب
لجل عيالنا
يطلعوا أسعد من اجيالنا
انت الظاهر مخك فاضى
وحتتعبنى معاك ع الفاضى
وأنا بحبت معاك بكفايه
ابقى اتفلسف عند القاضى
هى قضية ؟
لأ ملوخية
آمال فاهم ايه آمال
هى الدوله دى لعب عيال
ممكن أعرف أنا هنا ليه
أيوه حتعرف
أمال ايه
يوم خمسه وعشرين الماضى
ايه مشاك عند التحرير
تحرير ايه يا جناب القاضى
أنا مش فاضى
بكره تصير
بطل غلبه وجاوب دوغرى
أنا غلباوى كده من صغرى
كل الشيوعيين امثالك
آخر غلبه وقلة ذوق
يحصل ايه لو تمشى فى حالك
فاكر نفسك مين
ما تفوق
لو راح افوق
مش من مصلحتك
أما معجب جدا بصراحتك
أيه رأيك فى حكاية الطلبه
حاجه عظيمه بشرة خير
انت دماغك ينفع جزمه
وانت لسانك ينفع سير
أخرس قطع لسانك سافل
كتر خيرك
مخك قافل
مين وداك بقى عند الطلبه
رايح ضمن المندسين
رحت أناقشهم واسمع منهم
تسمع منهم ايه ياسى طين
دول عايزيين الدنيا تولع
علشان اصلا
مش فاهمين
هى الحرب يا عالم لعبه
دى بتتكلف بالملايين
وانت حتدفع ايه من جيبك
امال حدفع من جيب مين
انت حمار وخدوك فى مشمك
رحت هناك زى الباقيين
عاملين لجنه
وقال وطنيه
مش ممكن دول وطنيين
وجماعة انصار الثورة
وفلسطين وهباب الطين
ما نخلينا يا سيدى فى حالنا
مالناومال الفدائين
هو احنا اللى نهبنا بلدهم
دول عالم صيع فاقدين
قتلوا الراجل عند الشيرتون
واحنا اللى طلعنا القاتلين
وصفى التل ده كلب وخاين
اهو كل العالم خاينين
واحد صاحبى مراته مرافقه
وهو مرافق
ييجى عشرين
أمريكا بتزعل وبتحزن
هو احنا يا عالم ناقصين
مش نستعبر
م اللى جرالنا
ونعيش بقى زى العايشين
دى عيال عملا للشيوعيه
واحنا عدو الشيوعيين
روق دمك بس يا بيه
مين مساعدكو بفالو سنين
بيساعدونا صحيح يا سى بعجر
علشان أصلا مش فاهمين
احنا حليتنا منين نديهم
ونسددهم بالملايين
يمكن يعنى قضية مبدأ
مبدأ مين وزكايب مين
هى دى عالم تعرف مبدأ
دول بقول لك
ناس مجانين
اخترعولنا السد العالى
علشان نبقى اشتراكيين
اشتراكيه هناك فى بلدهم
واحنا فى دارنا
نعيش حريين
عايزيين الفلاح الجاهل
يتساوى بالمحترامين
وكمان قال
تحديد ملكيه
أبو ألفين
يدوه خمسين
شغل ملاحده وعالم كفره
ومخالفين احكام الدين
والعمال راخرين اسم الله
فاهمين روحهم
بنى آدميين
ناس عايزين الحرق بولعه
دا كله من الشيوعيين
نشروا لنا الأفكار السوده
أولاد الكلب الملاعين
مين وداك بقى عند الطلبه
انطق قول
اتكلم مين
هما ايه مطالبهم ؟
انت حتستجوبنى يا شاطر
لأ مش قصدى
بس أنا بسأل
كانو طالبين كراريس ومساطر
ولا مطالب ميه الميه
كل الشعب مآمن بيها
دول طالبين حرب وشعبيه
مين مجنون بقى
حيمشيها
عايزين يدوا الرتش سلاح
عشان تحصل فيها مجازر
أنا لو أشوف حلوف فلاح
شايل شومه
لازم اهاجر
لازم بينه وبينك دم
دم ف عينك
هس اتلم
ثم نحارب ليه
وبأيه
بسلاح ما يموتش بعوضه
روق دمك بس يا بيه
الحرب ضروره ومفروضه
واهو نفس سلاحنا المظلوم
فى فيتنام دابح أمريكا
دى طبيعه أرض يابتى آدم
بطلوا بقى كدب وبولوتيكا
طب ما الهند بنفس سلاحنا
فى باكستان
بعزقت الغرب
رأيك يعنى ضرورى ان احنا
وحتما يعنى نخش الحرب
طيب
حاضر
فين المخبر
حتغير رأيك
بالضرب يناير 
  1973

 ا


أغنية السلام ..
يقول الشيخ إمام في بداية الأغنية موضحاً ( أنا بدي أبينلكم موقف الشعب المصري من السلام ) ..

.............
بانوراما الدنيا فونية .. صندوق الدنيا عصري
الصورة من أميركا .. و الصوت من جوا مصري
لو تفهم كل قصدي .. أوهبلك نص قصري
و اكتبلك الوصية .. على جناح الحمام
و اتفرج يا سلام لم .. و اتفرج يا سلام
....
شوف عندك يا سلام لم .. و اتفرج يا سلام
هزلية مرسحية .. على تياترو السلام ( تياترو : المسرح )
سلام كلام أغاني ... و عليكم السلام
ما عاد على الغلابا عايد غير الكلام
و الحالة كل مادا يا سادة يا كرام
و اتفرج يا سلام لم .. و اتفرج يا سلام
.....
سالمة يا سلامة .. و دليلة رجعت بسلامة
مصرية و من مواليد شبرا .. من تحت نفقها و مجاريها
لو كانوا ما حرقوش الاوبرا .. كانت حتلعلع لياليها
بالغنوة المدهونة شفايف .. غرقانة و سايحة ببلاويها
سيد درويش اللي حيلتنا .. سرقوه و باعوه بيعة ندامة
سالمة يا سلامة .. و دليلة جات بالسلامة ..
....
سالمة يا سلامة .. كوكا كولا جات بالسلامة

نشروا الاعلان ... ملو الجرنان
جوا البراويز الدهبية
و التلفزيون بالصوت و اللون
كوكا كولا هي الاصلية
اشرب يا خفيف .. بطّل تخاريف
بلا   طيز الطور   بلا وطنية
كوكا كولا تفوق و تروق ضد الافكار الهدامة
سالمة يا سلامة .. طير بينا و رفرف يا حمامة
سالمة يا سلامة .. على مصر التانية أم علامة




يا فلسطينية ..
........
يا فلسطينية و البندقاني رماكو ..
بالصهيونية تقتل حمامكو فِ حماكو
يا فلسطينية و أنا بدي أسافر حداكو
ناري بإيديا و إيديا تنزل معاكو
على راس الحية و تموت شريعة هولاكو
............
يا فلسطينية و الغربة طالت كفايا
و الصحرا أنّت من اللاجئين و الضحايا
و الارض حنّت للفلاحين و السِقايا
و الثورة غاية و النصر أول خطاكو
........
يا فلسطينية و الثورة هيَّ الاكيدة
بالبندقية  نفرض حياتنا الجديدة
و السكة مهما طالت و بانت بعيدة
مد الخطاوي هو اللي  يسعف  معاكو
.........
يا فلسطينية فيتنام عليكو البشارة
بالنصر طالعة من تحت مية ألف غارة
و الشمعة والعة و الامر كان بالخسارة
راجعين حيارى عقبال ما يحصل حداكو




بوتيكات
بوتيكات النات كوا النَّات
وشقق مفروشه وعمولات
يا حلاوه الناوه كوا الناوه
يا بلدنا يا آخر فتاكات
بوتيكات النات كوا النات
**
شبيك لبيك فتح مخط
لبيك شبيك غمض عينك
حتقفّل مخك ح نطخك
ونلوشك لو تفتح عينك
ركب قرنين تركب مازدا
وتعيش سلطان في البرواز دا
مش عاجبك فالجبنه الفازده
والعيش والفول والكرَّات
يا حلاوه الناوه كوا الناوه
يا بلدنا يا آخر فتاكات
بوتيكات النات كوا النَّات
مين فيكوا ما يعرفش عليوه
شيّال المنيا الكحيان
في ثواني اتمول واتحول
بقي مسيو عليوه عليَّان
إزاي؟
ما هي بوظه ومفتوحه
على حس ولاد المفضوحه
وأرانب صاحيه ومدبوحه
تتأستك تبيع البنوكات
يا حلاوه الناوه كوا الناوه
يا بلدنا يا آخر فتكات
بوتيكات النات كوا النَّات

  • **
    حتقول الفقرا ومشاكلهم
    دي مسائل عايزه التفانين
    وأنا رأيي نحلها رباني
    ونموّت كل الجعانين
    وبهذا ما حشد
    ح يجوع
    لو نعلن هذا المشروع
    وح نقفل هذا الموضوع
    نهائياً
    ونعيش في تبات
    يا حلاوه الناوه كوا والناوه
    يا بلدنا يا آخر فتكات
    بوتيكات النات كوا النات
    سجن الاستئناف/ 1981



طلع الصباح
كلمات احمد فؤاد نجم ,,,,,,,,غناء الشيخ امام
طلع الصباح كل الجمال في طلعته
والنور سرح كحل عينينا بفتنته
والطير صدح للمولى جلّت قدرته
الحان جميلة تنعش القلب الحزين
يسعد صباحكم كلكم ياشغالين
الشمس طالعة بابتسامة الاْمل
شعلة ياقوت زي الخدود وقت الخجل
بتقول يا نايم قوم بدا وقت العمل
دي الدنيا خيرها وعزّها للشقيانين
يسعد صباحكم كلكم يا شغالين
يا ولاد بلدنا من جنوبها لشرقها
يا مشمرين عن السواعد كلها
النور حضن بلادنا و ضمّها
والشمس هلّت بالامل ع الشقيانين
يسعد صباحكم كلكم يا شغالين
طلع الصباح كل الجمال في طلعته
والنور سرح كحل عينينا بفتنته
والطير صدح للمولى جلّت قدرته
الحان جميلة تنعش القلب الحزين
يسعد صباحكم كلكم يا شغالين



المسحراتي
حبلت الايام سنين
ولدت الايام دهور
دامت الايام لمين
وحدّوا المولى الغفور
صلّي ع اللي في القيامة يشفعك
واصحى يللي نمت من اللي بيوجعك
واكشف اللي بيؤلمك و بيمنعك
وانده اللي لو ندهته يسمعك
قول يا جارة
قول يا جار
مهما طال الليل وجار
كل جرم وله مدار
و الكواكب دوارين
وحدّوه يا مؤمنين
صحّي نومك يا اسطى فكري يللي ناسي
هلّ يومك يا اسطى مرسي يللي راسي
يا حبايب مصر يا اْهلي يا ناسي
اللي يعشق بالسهر حتما يقاسي
اصحى يا نايم كفاية
وحّد الانسان معاي
طالت الليل الرحايا
والحدادي قلقانين
وحّدوه يا مؤمنين
..........
يللي صاحيين في البيوت
يللي كاشفين المكان
يللي سامعين السكوت
يللي واعيين للزمان
استعدوا للقيام
استعدوا للقيام
واقبلوا مني الكلام
مصر نايمة من سنين
وحّدوه يا مؤمنين




بقرة حاحا
........

ناح النواح و النواحة
على بقرة حاحا النطاحة
و البقرة حلوب .. تحلب قنطار
لكن مسلوب .. من أهل الدار
و الدار بصحاب .. و حدعشر باب (11 باب )
غير السراديب .. و بحور الديب
و غيلان الدار .. واقفين بنهار
و ف يوم معلوم ... عملوها الروم
زقوا الترباس ... هِربوا الحراس
دخلوا الخواجات .. شفطوا اللبنات
و البقرة تنادي .. و تقول يا ولادي
و ولاد الشوم ... رايحين ف النوم
البقرة انقهرت .. م القهر انصهرت
وقعت بالبير .. سألوا النواطير :
طب وقعت ليه ..؟
وقعت م الخوف
و الخوف يجي ليه .. ؟
من عدم الشوف

و قعت م الجوع و م الراحة
البقرة السمرا النطاحة
ناحت مواويل النواحة
على حاحة و على بقرة حاحا





 أوأه
هذه القصيده للمرحوم الرئيس انور السادات كلمات أحمد فؤاد نجم وغناء الشيخ امام
أوأه المجنون أبو برقوقه
عيره وبرانى وملزوقه
نصاب ومنافق ودماغه
مليانه مناطق موبوءه
والنكته كمان انه حلنجى
وعامل لى فكاكه وحندوقه
مع ان الحجش أفهم منه
والعالم فهمه ومفلوقه
بسلامته بيسرح قال بينا
يعنى احنا مواشى يا زقزوقه
داحنا العريفه الحريفه
غيرش الايام المدعوقه
شفت الولدات الشلبيه
ليلة التحرير يا أسطى فاروقه
أهو دولا ولادنا وأكبدنا
وقلوبنا عليهم مشقوقه
يا سلام يا صلاة النبى احسن
إلى حيل العلم يا مرزوقه
حلوين وحياتك يا بلدنا
يا أم الخيرات المسروقه
احنا اللى رمينا البذرايه
وروينا الارض المعزوقه
وحنحصد بكره وحنغنى
وعيون الخاين مخزوقه 
القاهرة / 1973




 جائزة نوبل
كلمات أحمد فؤاد نجم وكتبها بمناسبة معاهدة السلام وحصول مناحم بيجن على جائزة نوبل
شوف عندك يا سلاملم
واتفرج يا سلام
مواطن شخص عادى
مالوش اى اهتمام
ومبارك الخيانه
ومسميها السلام
وف يوم قرا الجرايد
تاريخ ما اعرفش كام
من يومها يا ضنايا
بيشقلب فى الكلام
واتفرج يا سلاملم
اتفرج يا سلام
على شقلب يا سلام
لنا محانم جيبن يادخ
زايجة لوبن
يعنى مناحم بيجن
ياخد جايزة نوبل
تبقى النوديا يعنى الدنيا
ماشيه بتحدف بالمندار
يبقى الشهر اتناشر ساعه
يبقى اليوم ليلتين ونهار
يبقى القاتل شحص ضحية
والمقتول مجرم جبار
شفتوا ازاى ؟
اما صحيح الطب اتقدم
وحنا ما وصلناش أخبار
أيوه يا لجنة لوبن بيه
قاعدة بتلجنى ايه
أنا مش فاهم حاجه صراحه
لما القاتل ياخد جايزه
كده من دون تلبيخ وأباحه
يبقى يا أما اللجنه دى بايظه
او لامؤاخذه رئيسها حمار
يبقى يا لجنه يا عره يا كوسه
جتنا وجاتكو ستين حوسه
تبفى ف هذا الزمن المايل
ياما حنجرى علينا هوايل
تبقى اللكمه بدل الكلمه
والكاتب يمسك منشار
يبقى الراعش يعنى الشاعر
يسكن شقة فى بيت ف قصيده
يكتب فول ياكل أشعار


مرحبا
بعد السلام والمرحبا
يا اولاد بلدنا يا طيبين
نفرش كلام المصطبة
واضح لكل السامعين
مصر الحبيبة الطيبة
أم البنية (بتشديد الياء) والبنين
ايش حالها في عز الصبا
ايش حال ولادها المخلصين
وسط العواصف مركبة (سفينة)
بين ريح شمال وريح يمين
جابوا الطبيب ابن الحلال
كشف مكان الداء وشاف وقال
أهل البصيرة في البلد
جواب لكل السائلين
قال البلد عاوزه ولد
ياخد بطار (ثأر) المظلومين
ولد يعوض اللي راح
ويعلا فوق كل الجراح
ويمد إيده في الضباب
يشد أنوار الصباح
فيكم ولد يا سامعين ؟
(يرد الكورس): أجدع ولد
طب هوه فين ؟ وهوه مين؟
كورس: ابن البلد
يا ابن البلد يا ابن البلد
الوقت وقتك يا ولد
يا قلب مصر ونبضها
كورس: يا ابن البلد يا ابن البلد
يا صبحها
كورس: يا ابن البلد
يا ربحها
كورس: يا ابن البلد
يا قمحها
كورس: يا ابن البلد
يا رمحها
كورس: يا نور سماها وأرضها
آدي كلام المصطبة يا اولاد بلدنا يا طيبين
بعد السلام والمرحبا واضح لكل السامعين
=======================================================
أنشد الشيخ رحمه الله هذه الأنشودة في طلبة الجامعة قبيل حرب 1973 فألهب مشاعرهم الوطنية وأتي هدير صوتهم واضحا في خلفية التسجيل . كان يطالب بقائد من بينهم يقود ثورة جديدة تقلب النظام وتصحح الأوضاع .
لا أكون مبالغا إن قلت أن خوف النظام من ثورة شعبية في تلك الفترة ربما يكون قد عجل بالحرب .



نويت أصلي 
نويت أصلي … نويت أصلي …
نويت أصلي صرصور دخل لي
هرش لي مخي قعدت أفلي ( أي وقفت حائرا أقلب الأفكار ، أفلي من التفلية أي البحث عن القمل بالرأس)
خربوش خرابش … صرصور مهابش ( صرصور شقي ذو هبش وخربشة)
وفضلت أهابش ما حد دلي ( ظللت أكافح وأحاول دون أن يدلني أحد)
حليت رباطي من تحت باطي 0 الباط هو الإبط)
لا قدرت أطاطي ولا طلت أعلي ( لم أقدر على الوقوف أو الانحناء)
حيران يا حالي سهران ليالي
وسنين بقالي مربوط في ضلي ( كيفما تحرك ظلي تحركت معه)
وسألت قال لي شيخنا المصلي
اركع تاراته اسجد تراللي ( تاراته وتراللي نغمات موسيقية تفيد رتابة الوتيرة والتكرار)
يارب ياللي … يارب ياللي (ياللي : يا من)
زرعت عودي سارح تملي ( أقمت جسدي كنبات ينمو دوما باستقامة)
وعدلت ضهري فوق سرج مهري ( وأقمت ظهري شامخا فوق حصاني)
وطبعت زهري على خد خلي ( ومكنتني من طبع قبلتي على خد حبيبتي)
وحياة معيشتي متعب ومشقي ( أحلف بمعيشتي التي ربما كانت سبب شقاء للآخرين)
مهمن (مهما) جري لي مهمن حصل لي
لاوهب حياتي واوصل صلاتي ( لأهبن حياتي كلها في صلاة متصلة)
والآتي آتي في يوم تجلي ( وليكن ما يكون يوم تتجلى لي ذاتك العلية)




لا نحالف
لما نحالف لا نحالف إلا الأخيار
لما نحارب لا نحارب إلا الفجار
دارنا هنا حرة و إحنا فيها أحرار
.......................
يللي دمانا المهدورة سفكتها يداك
يللي بلادنا المحتلة إحتلتها قواك
لك عهد الله لا نسمعلك و لا نمشي وراك
و لا نذهب شرقي و غربي و لا يمين و يسار
دارنا هنا حرة و إحنا فيها أحرار
......................
يا مشرد في البرية شعب فلسطين
و دبحت الشعب العربي دبح السكين
لنخاصم لجل (لاجل) عيونك روسيا و الصين
ولا نقبل صدقة و رشوة بجنيه و دولار
دارنا هنا حرة و إحنا أصحاب الدار
.......................
يا مغرور يللي غرك إكرام الضيف
لو تعرف مين العربي في يوم الحيف
لا يحاور و لا يتكلم إلا بالسيف
لما نحالف لا نحالف إلا الاخيار
لما نحارب لا نحارب إلا الفجار


 بيان هام
هنا شقلبان
محطة اذاعة حلاوة زمان
من القاهرة ومن كردفان
وسائر بلاد العرب واليابان
ومن فنزويلا أيضا ايران
ومن اى دار
أو بلد مستباحه
بفعل السياحه مع الأمريكان
هنا شقلبان
محطة اذاعة حلاوة زمان
نقدم اليكم بكل اللغات
مراسح وسيما وجميع الفنون
صحافه ومنابر وتلفزويونات
وخطبا ف جوامع وجبنه وزيتون
ونقزح ونركب جميع الموجات
ونبحث ونفهم فى كل الشئون
ودايما نلعلع فى كل الحالات
ولا حد سامع ولا يحزنون
وتسمع ما تسمع دا ما يهمناش
لأن احنا اصلا بناكل بلاش
فخليك فى نفسك وما تخليناش
نسلط عليك القلم واللسان
هنا شقلبان
محطة اذاعة حلاوة زمان
يسر الذاعه ولا يسركوش
بهذى المناسبه ولا بندعيكوش
نقدم اليكم شحاته المعسل
وبدون الرتوش
شبندر سماسرة بلاد العمار
معمر جراسن للعب القمار
وخارب مزارع و تاجر خضار
وعقبال أملتك أمير الجيوش
ما تقدرش تنكر
تقول ما اعرفوش
ما تقدرش ايضا تفول ما أسمعوش
شحاته المعسل حبيب القلوب
يزيل البقع ولاهموم والكروب
يأنفس يأفين يبلبع حبوب
ويفضل يهلفط ولا تفهموش
وتفهم ما تفهم دا ما يهمناش
لأن انت فاهم وعامل طناش
ح تنكر وتحلف ح اقول لك بلاش
ح تتعب دماغنا وتتعب كمان
هنا شقلبان
محطة اذاعة حلاوة زمان
لأن المخبى ظهر واستبان
وكل المسائل بدت للعيان
وطلعت حكاوى ونزلت كمان
عن التهريبه وعن كيت وكان
وعن محسوبيه وعن ألعبان ( بضم الالف)
ظهر فى المدينه كأن الطوفان
وغرق مراكب وسوح غيطان
وبعض المراكب ح تغرق كمان
وأزمة مساكن وأزمة أمان
وعالم بياكل فى عالم جعان
وريحة مؤمره فى جو المكان
مخطط خيانه مع الأمريكان
لدبح العشيره وحرق المكان
وفيه ناس بترغى ولازم بيان
كما ابلغونا جميع الودان
لهذا وذاكا وتلكم كمان
نقدم اليكم عروسه وحصان
شحاته المعسل وهذا البيان
هنا شقلبان
محطة اذاعة حلاوة زمان
بسم الله
سلام عليكم وسلمون وموز
وأما المسائل فهنجف ولوز
فيا اخوتى ويا أخوات
اليكم بيانى كما هو آت
جميع المسائل تمام التمام
وكل الكلام دا مجرد كلام
فصبرا جميلا ولا تقلقوش
وشغل الضغاين أنا ما أقبلوش
ما فيش أى حاجه
على الطلاق والعتاق بالتلاته
ما فيه اى حاجه
وقدر كمان ان فيه أى حاجه
ما لوش أى لازمه الكلام واللجاجه
وعيب ان عيل يسوق السماجه
ويعمل لى باللو ويعمل ديباجه
آنا بطبعى ضد السماسره الكبار
بحكم المنافسه وحكم الجوار
لكن مش فى طبعى
انى أعمل فضيحه
لواحد زميلى هبش كام صفيحه
ما كل الزمايل بتهبش صفايح
وكل اللى جاى مش زى اللى رايح
فيا ايها الشعب صهين تفلعص
مساء التنفس مساء الروايح
أخويا الامير بزرميط الايرانى
بعت لى السنه دى
عزمنى ودعانى وأنا قبلت طبعا
ورحنا العزومه وكانت وليمه
ما تحصلش تانى دا أيه المحمر
وأيه المكمر وايه المشمر
وايه الصوانى
وانا دماغى تعبت ولفت صراحه
من الفخفخه والهنا الاصفهانى
هناك يعنى مثلا اذا شربت طافيه
تمز بكوارع وبسطرمه ضانى
ما شفتش هناك
ناس بتحقد عليهم
ولا ناس بتشتم فلان الفلانى
لأنه اشترى عزبتين من شطارته
وحكمة ادارته وطلع مبانى
وبعد الوليمه استلمنا الهدايا
مفضض ومدهب وقز وقيشانى
وطبعا أخويا الأمير قال لى حاجه
ح اقولهالكو طبعا اذا الوقت ناسب
ح يطلع لى عيل بدون اى حاجه
ويعمل لى فلحس ويقعد يحاسب
دا حقد اشتراكى أنا ما أقبلوش
ولو هو ابنى أنا ما اعتقوش
كلام عن سماسره كلام عن دعاره
حاجات مش صحيحه جمل مستعاره
وعايزين يخلوا البلد اردغانه
وعايزنى اسيب البلد من زمان
وأنا مش ح اسلم واسيب الأمان
ولا بالبوليس والنيابه كمان
فيا ايها الشعب كمل جميلك
وصبرا واذلم حتيجى المصارى
وتاكل وتشرب تبع ما يآتيلك
وتغرق فى بحر العبيد والجوارى
وترسم حياتك حسب ما يرائيلك
ونملا الحوارى فساقى وقصارى
تسبح بحمدك وتشكر جميلك
وفضل الزباله وطفح المجارى
ختاما سلاما وآخر كلاما
ضرورا
يسود الهدوء والوئام فماذا والا
ح طربقها واللا اهرب فلوسى
واسافر قواما سلام عليكم
وسلمون وموز بصفتى رئيسا
وابا وجوز
القاهرة /1967



دور يا كلام على كيفك دور

دور يا كلام على كيفك دور
خلي بلدنا تعوم في النور
وارمي الكلمة في بطن الضلمة
تحبل سلمة وتولد نور
يكشف عيبنا ويعيبنا
نسعى نهب نثور
دور يا كلام على كيفك دور
عم امام عنده كلام
وسواح في بلاد الناس
من شوق نوله يغزل قوله
ويغني مرفوع الراس مرفوع الراس





نشيد الكروان ( إلى الشعب )

دار الفلك .. في مغزلك
طول السنين ما أمهلك
يا ماسك الروح في الحياة
الحب لك و الخلد لك
أنت الازل و انت الابد
و الهالك اللي يجهلك
يا شعب يا روح الخلود
الملك لك و الخلد لك
..
الليل حلك .. و البوم سلك
و البحر عطشان منهلك
و السهم طاش
اسقس العطاش
انت الكريم و بنسألك
....
يهوذا خان .. أكم يهوذا و باع مسيح
لا يهوذا دام و لا جرح بلاد ٍ جريح
مليون يهوذا خان أمانك و إنهلك
و انت اللي باقي
عالسواقي
و منجلك
يفرش حصير القمح .. فوق دم المسيح
و انت الجريح
تيجي الاطبة و تسألك
ما أعجبك
ما أنجبك
ما أحملك
ما أنبلك
يا شعب يا نبض الوجود
الخلد لك
و الملك لك
الحكم لك .. الحكم لك

استغمايه
غمي عيونك
سد ودانك
إفتح بقك
قول انا فين

الشاطر فيكو
يحزر فزر
في دقيقتين
والإشطر منه
اللي يحزرها
في غمضة عين
والإشطر خالص ما يحزرش
يقول انا فين
والإشطر أشطر
اللي يبص يشوف بالعين
انا فين ؟
فيه ناس
اختلف في الموضوع
وحكاوي اتقالت
عن مواضيع
والناس لا مؤاخذة
في زمن الجوع
يتعشوا كلام
يفطروا تشنيع !

فيه واحد شافني
بلبده ولاسه
في باب اللوق
والتاني
لمحني بقفصين موز
علي باب السوق
والتالت شافني
في كاديلاك
راكب مع بنتين
والرابع
شافني ف طنطا
بابيع
بلابيع ونشوق !
وصحافه الصاوي
والورداوي
والجمال
وأباظه ولاظه
وباقي الدلاديل
والأندال
بتأكد جدا
جدا جدا بالتدقيق
إن انا محبوس
وباروح يوميا
للتحقيق!

طب اصدق مين
وأكدب مين ؟!
ماهي حاجه تمخول أيها عاقل
وانا مجنون
وباكلم نفسي
وعقلي صراحه
ماهوش مضمون
لو كنت بلبده ولاسه
وماشي ف باب اللوق
طب إيه مشاني
مفلس جدا
جنب السوق ؟!
لوكنت بدأت
كتاجر فاكهه
وبقفصين ؟
مش كنت زماني
معلم طمبه
وجوز اتنين؟

لوكنت ف كاديلاك
زي ما قال
التالت بيه
ومعايا بنات
زي الشربات
طب ح انزل ليه ؟!

لوكنت يا طنطا
بابيع بلابيع
وسطل وبخور
مش كنت زماني
مدير على جامع
أو مأمور ؟

وصحيح الصاوي
والورداوي
والجمال
حابسين أفكار الناس
في بلدنا
وعال العال
إياك قاصدين
إن انا مسجون
زي الملايين ؟
كده يبقي تمام
ولأول مره
ح اقول " صادقين "
بس انا لا مؤاخذه
وبالتدقيق
ماحصلشي معايا
ولا تحقيق !
مش حاجه تحير
طب أنا فين ؟
حزرتوا خلاص
فزرتوا خلاص ؟
عارفين
أنا فين
أنا ساكن قلبي ومتونس
بالناس
والناس الونسه كتير
ماليين القلب
وشاغلينه
سارحين في الدم
وفي التفكير
وجناين قلبي العمرانه
بالناس
الأزهار
العصافير
سايعاني
وسايعه اللي باحبه
وتساعي معايا
رفاقه كتير
شايفين انا فين ؟
الشاطر فيكو
يحزر فزر
في دقيقتين
والأشطر طبعا
حيحزرها
في غمضة عين
أنا ...... فين ؟




الإضراب
باسم الإله الشعب
رب المضربين
الصايم
المحروم على مر السنين
يا منشدين الحي
حيوا حينا
واحنا هنا
ع العهد دايما مخلصين
محلا القصايد
في الشدايد .. والغنا
محلا الكلام الحب
أوقات الشقا
احنا اللي تهنا ع الطريق
من بغضنا
متفرقين
والسجن هوا الملتقي !
آه يا رفاقه
من متاهات الطريق
لما الليالي
بيتخنق فيها القمر
يمشي الصديق
في الضلمه
يخبط في الصديق
والسكه بنت الخطوتين
تاخد سنه !

إحنا النهارده فين
وكام
وبكره كام
وبعده فين ؟
في كل يوم بنزور مكان
وكل يوم
بنزيد عدد
وكل يوم
نفتح بيبان
وكل يوم
بنزيل سدد
وكل يوم
يطلع بنا
وكل يوم
ينزل هدد
وكل يوم
نحبل غنا
وكل يوم
نولد مدد
احنا كده لازم نكون
جوا السجون
برا السجون
محلا القصايد
في الشدايد والغنا
محلا العيدان الخضر
في الربع الخراب
احنا اللي تهنا ع الطريق
من بعضنا
متجمعين
بنخط صفحه في الكتاب
ملعونه قامه تنحني بالقهر
من حاكم .. وخان
ملعونه كلمه تنتني في الحلق
تهرب م اللسان
ملعونه ساعه تنحسب م العمر
يطويها الخنوع
ملعونه لقمه مغمسه بالذل
ملعونه الجبان
آه يا رفاقه
ياللي عملتوا الصلابه للحجر
بانده لكم
وسط الكآبه
والرتابه .. والضجر

يا مقربين الفجر
نوره ومطلعه
مدوا المسامع
في المجامع
واسمعوا
صرخة مغني الحي من جوف العدم
اتجمعوا
اتجمعوا
اتجمعوا



مقدمة أبو العلا 90
الكورس _
سافر غريب الدار
مشوار ورا مشوار
بلد الحبايب .. فين ؟
تاه السؤال واحتار
المغني _
ومشيت كتير ورأيت
ناس ع الطريق ضايعين
ورجعت تاني لقيت
ناس ع الطريق راجعين
وعملت قلبي سبيل
يهدي الحيارى
دليل
وعشقت
عشق النيل
للخضره والنوار
الكورس _
سافر غريب الدار
مشوار ورا مشوار
بلد الحبايب .. فين ؟
تاه السؤال واحتار
المغني _
يا سكه الأحلام
يا مغربه روحي
اشكيكي للأيام
ولا أشتكي روحي
علمتي قلبي يميل
للحب
والمواويل
وحلمت حلم جميل
بالجنه
ونا في النار


بابلو نيرودا
شيلي البارود
حطي الوعود
والتعليلات
في المهملات
سفحوا الورود
من ع الخدود
والخضره
من قلب البنات

فين الأمان
جنب الغيلان
يا ملفقين
عصر التبات ؟

لا الجرح بات
ولا إتنسي
ولا التاريخ
والذكريات
سيدنا الحسين
اسبارتاكوس
الليندي
لوركا
عب رحيم
فلاح بلدنا اللي انشوى
قبل القيامه
في جحيم
سينا الطعينه المزمنه
ارنستو
جيفارا العظيم
خميس وبقري
والشفيع
أدهم
ومواله القديم
قطب الرجال اللي ابتلي
لما تلا الذكر الحكيم
عقد العقيق اللي اتبدر
من عهد سقراط الحكيم
زاد النهارده
وانتظم
بالدره والفص اليتيم
نيرودا
زمار الصباح
نيرودا
مزمار النسيم

صابحه الصبيه
" سانتياجو "
تشرب لبنها من غناك
اتروعوا العصافير
وهاجوا
لما نعيت البوم
نعاك
وانت الشهيد
ملو البراح
جراح تعود المجروحين
ساعتين تشاور
ع الجراح
ينشد ضهر المطعونين
تتمدد إيدهم ع السلاح
وبعزم ما في الموجوعين
تطعن في شريان الطاعون
تجهز
على الداء الدفين
الشمس تطلع بالصباح
ترمي الصباح
على كل الإبد
حاضنه البنادق والجراح
بإيد وعافقه الناي
بإيد
والشمس تطلع في النهار
فوق كل قصر
وكل بيد
والشمس تسقط
في الغروب
عن بابلوا نيرودا .. الشهيد
دواره بتعدي السنين
يا أرضنا
يا ام البنين
دواره بتعدي اللي فات
يا أرضنا يا ام البنات
كروب
حروب
محن شعوب
كلاب
عذاب
ضباب
غروب
بروق
رعود
شروق
صعود
نضال
سجال حرام
حلال
والعدل .. كان
في كل آن
هو القضية
والرهان
والارض عاشت من زمان مسرح لفرسان الميدان
سيدنا الحسين
اسبارتاكوس
جيفارا
لوركا
عب رحيم
نيرودا زمار الصباح
نيرودا
مزمار النسيم



عطشان .. يا صبايا
عطشان يا صبايا
وانا عاشق .. ع السبيل
عطشان
والميه ف بلدي
على عكس ما يجري النيل
والنخل العالي مطاطي
والجذع الواطي
ذليل
والريح العاكس
كابس
والريح العاطي
بخيل
والنسمه اتعكر لونها
من هم الناس
يا خليل
عطشان والنيل في بلدي
والزرع اخضر
وجميل
وانا كنت امبارح خالي
واليوم دا
صبحت عليل
عطشان ودوايا حبيبي
يسقيني العشق دليل
ودليل الحب .. عمايل
وكلام الحب جميل
وانا كل ما أقول التوبه
تغويني .. المواويل
تطرح في القلب جناين
تفقس فيها الزغاليل
عشاق يا حمام الغيه
ولا فيش قدامنا بديل
سكه ومحسوبه علينا
نمشيها
جيل ورا جيل
ع الشوك
نفرد خطاوينا
في الليل
تضوي القناديل
حوالينا قلوب حبابه
ومعانا العقل دليل
والشمس تصب صبابه
والمنبع
نهر النيل
وان لاموا علينا
يلوموا
ما لهمش علينا سبيل
ما هو شوك العشق
ملامه
والشوك
في الورد أصيل
ودوني ع السبيل
ودوني ع السبيل



الشاعر الأكره
أنا الأديب لما أتكلم ما باخليشى
لأني جاهل
وفاجومي
ومخ مفيشي
وأي تغيير في حياتي
ميتعبنيشي
وأنا اللي قولي على نويى
مش من بره
وأبدأ كلامي عن الأشعار
واللي زانوها
بيرم وخيرى
وكل الناس اللي صانوها
أما الكلاب عند الجواسيس
واللي خانوها
فدول كلاب
وما مبنذكروش هنا بالمره
الله الله يابدوي
هنا بالمره
***
ياعم بيرم وحياتك
واللي أماتك
وخلا الناس مآبين
عايشيين على مقالاتك
وواد مباحث يتطاول
على مقاماتك
لاجعل الشعرا الأندال
مسخه وعبره
الله الله يابدوى
هنا بالمرة
***
فى كل مولد ياشويعر
لفلفت حزام
ورقصت تبع المزيكة
وكنست مقام
وصاحبت كل الألاتية
ومشيت خدام
لكل عالمة وشبشبها
حسب الأجرة
***
حرباية يابن الحرامية
مية المية
على كل لون جاهز تركب
ع التسقية
أما انت مالح ومزبط
وابن غبية
وحصانك اللي راهنت عليه
يخسر بكره
الله الله يابدوى
يخسر بكره
***
الطبل غير الشعر يا واد
ماتهبلشي
وأى شخص يكون شاعر
مايطبلشي
ياتقول كلامك جواك
يا متقبلشي
ملعون ابوك طالع نازل
شاعر أكره
1975م




فات الهوى
فات الهوى سلم علي
بات السهر ساكن عنيه
عاد الهوى بين يوم وليله
وإحنا سوا يا نور عنيه
فات الهوى
آه يا أسمراني
لحظه ما فات لحظك
ناداني
عاد الهوى قام التقاني
زى الهوى
قلبي ف إيديا
فات الهوى
يا واد يا خمري
سلم
وأنا سلمت أمري
عاد الهوى بالشوق يا عمري
يملا السهر والنوم عليّ
فات الهوى
آه يابن عمي
زى الهوا شعلل فى دمي
وأما شكيت الوجد لآمي
ضحكت
وباستني ف عنيه



هو شي منه
يادي العجب يا رجب
يا مرتب الحكايات
إسمع وشوف وإندهش
وأكتبها فى الكتبات
عسى الكلام ينقري
لو قلبوا الصفحات
خلي الشعوب والدول
تتعلم البطولات
الحزن طول عمرنا
له من حياتنا حياه
نقضيها فى النهنهه
ونضيع إلآوقات
نبكي على اللي مضى
ونعيش مع اللي فات



سايجون
أبجد هوز
حطي كلمن
إفتح صفحه
إمسك قلمن
إكتب زي
الناس ما بتنطق
سقطت سايجون
رفعوا العلمن
طلعت شمس اليوم دا
أغاني
كل ما نسمع
نعشق تاني
طلعت شمس اليوم دا
حريقه
تشفي الجرح
وتبري الألمن

سايجون عادت للثوار
فوق الدم
وتحت النار
جدوا فوجدوا
زرعوا
فحصدوا
وإحنا إدينا للسمسار
وإللي قالوه السمسارجيه
وإللي حكاه السمساردار
لما قروه القروانجيه
بالمستعدل والمندار
هتش ونتش
بعزم الصوت
عن أمريكا وهوا أمريكا
زعموا الفانتوم
شايل موت
سقط الموت بعلم أمريكا
جاتكو فضيحه
يا طبقه سطحيه
وعامله فصيحه
وجايبه العار
قراونجيه
وكتبنجيه
وسمسارجيه
وسمساردار

سايجون دره يا ثوار
عادت حره
للأحرار
داحنا حنشبع بكره أغاني
إسمع وحفظ يا كتباني
واثبت عندك فى الأوراق
مصر بتنضح بالأشواق
مصر عروسه
وبكره عريس
والعشاق إحنا العشاق
فينا وبينا ولينا الثوره
إحنا الثوره
وهي الناس
فينا الماضي
وبينا الحاضر
والمستقبل
هو الناس



عنيكي
وعنيكي سكة سفر
في الصحرا .. والواحه
والشوق .. ودنيا السهر
لانوم .. ولا راحه
ولا الرموش السود
بينادوا ع الموعود
وانا اللي خدني الغزل
ع الجنه طوالي
وشربت نهر العسل
وغزلت موالي
وسهرت فيكي الليل
والناس تقول يا ليل

ورجعت سكة سفر
في الصحرا .. والواحه
في عنيكي

وانا باقول يا ليل
ولكل عاشق ليل
يا جنه الملتقي
مين فات سأل عنا
ومين عطف بعدنا
ع الورد .. يا جنه
من لحظه كنا سوا
والعشق كا تباريح
ورجعت سكة سفر
في الصحرا .. والواحه
في عنيكي



أبو العلا 90 الخاتمة
سيبه سيبه سيبه
خليه ياخد نصيبه
دا واحد عصر حجري
وشايل قلب غجري
لو هو قطر مجري
بكره الجنان يصيبه
ويخرج عن قضيبه
وراك وراك ياشاطر
يا ملخبط المسائل
يا مقدم الأواخر
ومأخر الأوائل

إسمك ؟ ما اعرفش اسمك
ولا حتي شفت رسمك
ولا تخليت كسمك
بعيده من قريبه
لكن لازح اجيبه
وراك وراك يا غاوي
تتسلى بالمواجع
وتشرب القهاوي
بمناسبة الفواجع

شرك شعلل شرارك
وحرق جارك ودارك
وان كان على قرارك
لو حتى فين ح اجيبه
ومش ممكن ح اسيبه



مٌر الكلام
مٌر الكلام
زي الحسام
يقطع مكان ما يمر
اما المديح سهل ومريح
يخدع صحيح ويغٌر
والكلمة دين
من غير إيدين
بس الوفا
ع الحر



النيل عطشان
النيل عطشان يا صبايا
للحب والحنين
والشط
لانور
ولا نسمه
ولا ناي
ولا عود يا سمين
****
يا شاهنده وخبرينا
يا ام الصوت الحزين
يا ام العيون جناين
يرمح فيها الهجين
ايش لون سجن القناطر
ايش لون السجانين
ايش لون الصحبه معاكي
نّوار البساتين
كلك محابيس يا بلدنا
وهدومك
زنازين
وغيطانك الوسايع
ضاقت ع الفلاحين
والدخان في المداخن
لون هم الشغالين
***
يا بنات النيل يا سبايا
ف حبال الجلادين
ما بقاش في زمانكم عنتر
لكن فيه الملايين
فارس محسوب الخطوه
يتحرك بالقوانين
لحظة ما تحين الساعة
يركب ضهر التنين
ويحطم الحواجز
ويفك المساجين

سجن الاستئناف 1980



ديستان
فاليري جيسكار ديستان
والست بتاعة كمان
حيجيب الديب من ديله
ويشبع كل جعان
يا سلاملم يا جدعان
ع الناس الجنتلمان
داحنا حنتمنجة واصل
وحتبقى العيشة جنان
التليفزيون حيلون
والجمعيات تتكون
والعربيات حتمون
بدل البنزين
بارفان
وحتحصل نهضة عظيمة
وحيبقى علينا القيمة
فى المرسح او في السيما
او ف جنينة الحيوان
وحتبقى الاشيا زلابية
ولا حوجة لسوريا وليبيا
وحنعمل وحده ارابيا
مع لندن والفاتيكان
والفقرا حياكلوا بطاطا
وحيمشوا بكل الاطة
وبدال ما يسموا شلاطة
حيسموا عيالهم
جان
واد بفضل صديكي
ديستان الرومانتيكي
ولا حدش فيكو شريكي
فى المسكن
والدكان



تاجر
تاجر نزل سوق
شاف غزاله
مع الدلال
قرب يدوق العسل
نهر الدموع شلال
شرب عديم التنا
من دمعنا المسفوح
زاد فى السعار والغنا
من خسه الدلال
اخص
اخص
اخص .. على كده



حرب الشعب
ماتقولليش
ماتعدليش
حرب الشعب وغيرها مافيش
حاس يامصاروه
حاس ياولاد
حاس يامداين
حاس يابلاد
حسنا ياناسنا وداسنا الغول
عض بلدنا
عرض وطول
ماتقولليش الجيش مسؤل
جيش من غير شعب
مايمشيش

1968م



الشيخ عاشور
سلام مربع يا بلد
للشيخ عاشور
قلب الاسد
سلام يا واد
على دا ودا
لو دسته منه
فى البلد
ما كانش كان
كل اللي كان
ولا كان دا حالك يا بلد
مدد يا شيخ عاشور
مدد
مدد يا شيخ عاشور مدد

القاهره / 1968



دعوة
يا خالقنا وعالم بلاوينا
يا رازقنا
وحاسب خطاوينا
نسأل فضلك
من إحسانك
يظهر عدلك
وبسلطانك
يطلع فلاح من وسطينا
يزعط أفندينا
وحرامينا

القاهره / 1986



يا مصر
فلاحينك هما هما
فلاحين رمسيس وخوفو
جيش
لا عيش ولا زمزميه
فى الهجيره تبل جوفه
المرض للموت يجرة
وهو ماشي
يجر خوفه
أعمي
سالك سكه عتمه
خطوته
على قد شوفه

معتقل القناطر / 1970



أخر الكلام
وآه يا خي اه
ياخي
كنا نملا الدنيا ضي
بس اه
لو كنا زي
الف اه
واه يا خيكنا جبنا الشمس
من برج الاسد
واديناها للعيال
غزل البنات
يطبعوها ع الهدوم
والكراسات
يشبكوها
ورد شعور البنات
ينظموها
عقد من شر الحسد
يضوي نوره
لما يضوي
كل حاره وكل حي
بس اه لو كنا زي
الف اه
واه ياخي
كنا المظلوم اذا هاجم
جري
كنا لو كان السلاح فى يدنا
والمعارضه
يد واحده عندنا
دسنا شاهنا
وامريكانه بنعلنا
وابتدينا الثوره
من اوسع طريق
كان تمنتاشر يناير
ف الشوارع لسه حي
بس اه
لو كنا زي
الف اه
واه ياخي



الخط دا خطي
الخط دا خطي
والكلمة دي
ليا
غطى الورق غطي
بالدمع يا عنية
شط الزتون شطي
والارض عربية
نسايمها انفاسي
وترابها من ناسي
وان رحت انا ناسي
ما تنسانيش هى
والخط دا خطي
والكلمة دى ليا
لاكتب على عينى
يحرم عليكى النوم
واحبس ضيا عينى
بدموعى طول اليوم
قبل الوفا بديني
زي الصلا والصوم
والدين فى عرف الحر
هم ومذلة ومر
وشجون تصون وتجر
احزان مخبية
والخط دى خطي
والكلمة دى ليا
لاكتب على كفي
والحبر من دمي
ياهمتي كفي
يا عزوتى ضمي
اول ما ح نوفي
بالوعد
ح نسمي
باسم اللى ماتوا صغار
فى المدرسه والدار
والمصنع اللي انهار
فوق الصنا يعية
والخط دا خطي
والكلمة دى ليا



بلح ابريم
يابلح ابريم يا سمارة
سواك الهوي ف العالي
هويت
على طمى النيل ياسمارة
وشربت عكار
لما استكفيت
بس احلويت قوي يا سمارة
لما اسمريت قوي ياسمارة
لفيت الشارع و الحارة
على زى نقاوتك فين
ما لقيت
يا حلاوة بنار
يا حلاوة بنار الشمس النور
يا سمارة وعمار الصحرا البور
شباك الهوى
داير ما يدور
اتاريك دبت وطبيت
بس اغلويت قوي ياسمارة
لما اتدليت قوى ياسمارة
ونزلت الشارع الحارة
سوقك
لا رخصت ولا اتذليت
يا بلح ابريم
ياسمارة

حصنت بعقدك صدر الناس
من شر النخاس الخناس
يابو قلب لا سوسه
ولا سواس
ورقيتك يا اسمر
واسترايت
الضم حبابيك بقي ياسمارة
وافتح شبابيبك لقا يا سماره
على جو الشارع
والحاره
تحلو زيادة
وتملا البيت
يا بلح ابريم يا سماره



الحمد لله
الحمد لله خبطنا
تحت بطاطنا
يا محلا رجعه ظباطنا
من خط النار
يا اهل مصر المحميه
بالحراميه
الفول كتير والطعميه
والبر عمار
والعيشه معدن واهي ماشيه
اخر اشيا
مادام جنابه والحاشيه
بكروش وكتار
ح تقول لى سينا وما سينا شي
ما تدوشناشي
ما ستميت اوتوبيس ماشى
شاحنين انفار
ايه يعني لما يموت مليون
او كل الكون
العمر اصلا مش مضمون
والناس اعمار

الحمدلله وأهي
ظاطت
والبيه حاطط
في كل حته
مدير ظابط
وإن شالله
حمار 

ايه يعني فى العقبه جرينا
ولا ف سينا
هى الهزيمه تنسينا
اننا احرار
ايه يعني شعب ف ليل ذلة
ضايع كله
دا كفاية بس اما تقول له
احنا الثوار

الحمد الله ولا حولا
مصر الدوله
غرقانة فى الكدب علاوله
والشعب احتار
وكفايه اسيادنا البعدا
عايشين سعدا
بفضل ناس تملا المعده
وتقول اشعار
اشعار تمجد وتماين
حتى الخاين
وان شا الله يخربها مداين
عبد الجبار

القاهره / يونيو 1967



كلب الست
فى الزمالك
من سنين
وف حما النيل القديم
قصر
من عصر اليمين
ملك واحدة من الحريم
صيتها اكتر م الادان
يسمعوه المسلمين
والتتر والتركمان
والهنود والمنبوذين
ست فاقت ع الرجال
فى المقام والاحترام
صيت وشهره وتل مال
يعنى فى غايه التمام
قصره يعني هى كلمة
ليها كلمه فى الحكومه
بس ربك لجل حكمه
قام حرمها م الامومه
والامومه
طبع ثابت
جوه حوا من الزمان
تعمل ايه الست
جابت
فوكس رومي وله ودان
فوكس دا عبقال املتك
عندة دستة خدامين
يعنى مش موجود فى عيلتك
شخص زية يا اسماعين
واسماعين دا يبقى واحد
م الجماعة التعبانين
اللي داخوا فى المعاهد
والمدارس من سنين
حب يعمل واد فكاكة
يمشي حبة فى الزمالك
والقيامة والفتاكة
يرموا طبعا ع المهالك
عم سمعة من قيامتة
حب يعمل فيها فلة
بعد ما الوظ بيجامتة
اشترى حتة مجله
قول مشي يقرا فى حكاية
من حكايات الغرام
واندماجة فى القرايه
خلا مشيه مش تمام
ع اليمين يحدف بعيد
خطوتين ويروح شمال
لمحه فوكس من الحديد
قال دا صيد
سهل حلال
هب نط فى كرشه دوغري
جاب بيجامته لحد ديلها
اسماعين بدال ما يجري
قال يا رجلي
رجلى مالها ؟
بص شاف الدم سايح
من عاليها ومن واطيها
وياللى جاي
وياللي رايح
المجله مش لا قيها
حبه واتلموا الظنايا
اللى هما البوابين
والحكايه والروايه
قال لهم
دا كلب مين
كلب مين
ما كلب مينشى
سمعه لبخ حبتين
قال واحد منهم
امشى
اللى جابك عنده مين؟
قال دا شارع يا مواشي
والجميع بيمر منه
اللى راكب
اللى ماشى
مستحيل نستغنى عنه
كلمه من دا
وكلمه من دا
ظاطو واترسمت فضيحه
قول نهايته
القصد من دا
اسماعين اكل الطريحه
راحو قسم الشرطه طبعا
والنيابه كفيله بيهم
واترموا فى الحجز جمعا
لما ييجي الدور عليهم
حبة والشاويش امين
قال : سعيد النقشيندي
قام غريم عم اسماعين
قال لة:
محسوبك يا افندي
قام سي سمعه
يروح معاه
الشاويش قال :
غور بدمك
راح تعوصنى
وفوق قفاه
كف طرقع
داهيه ف امك
تفتكر يفضل سي سمعه
قد ايه فى القسم نايم ؟
استضافه الحجز جمعه
يا بلاش
ادي العزايم
شاف بلاوي
ما تتحكيش
م الديابه المسجونين
قال يا عالم
يا شاويش
يا نيابه
يامسئولين
خلصوه بعد المناهده
جثه من جحر الديابه
هى يمكن ساعه واحده
كان فى مكتب النيابه
قال له مالك يااسماعين
قال لة زي البمب ... مالي ؟
قال له عضك فوكس فين
قال له سيبنى اروح لحالي
انت شوف سي فوكس يمكن
خد تسمم
غصب عني
الوكيل قال برضة ممكن
والشاويش
قعد يغنى
انت فين والكلب فين
انت قدة يا اسماعين
طب دا كلب الست يا ابني
وانت تطلع ابن مين
بشري لصحاب الديول
واللى له اربع رجول
بشرى لسيادنا البهايم
من جمايس او عجول
اللى صاحبه يا جماعه
له غناوي
فى الاذاعه
راح يدوس فوق الغلابه
والنيابه .. بالبتاعه



شجرة لو
يا اماني يا شجره ف بستاني
بتفرع يا ما وتعلو
وبيستناها الفكهاني
ولا تطرح غيركلمه لو
لوأغمض وافتح تانى
الاقينى طاير فى الجو
والشمس عروسه مقابلانى
بالطرحه الدهبي وبالضو
لاخطف طرحتها وفرحتها
وانزل فى اللحظه وفى التو
ابدر انورها واشواقي
ع الارض تنور تحلو
والمس بالكف المتحني
ع الزرع يبشر ويمني
والحب يرعرع
ويغني
والعمر يهني
ويغلو
ويقوموا الناس فى الفجريه
والصبح بيضحك هأ او
والليل بعيونه الحراميه
بيعيط خايف م العو
وامانى كتيره مشاغلانى
ممكن تتحقق يوم او
على راي صاحبنا البستانى
لو تطرح يوم شجره لو

القاهره / 1967



أول كلام
كلامنا عن ايران
ما لوش طبعا مكان
فى اعلام الخيانه
وصوت الامريكان
لان الامن شايف
بان الأخ خايف
ليلزق على الشفايف
ويلبس فى الودان
كلام عن الخيانه
ومن عالم جعانه
فتظهر الادانه
على الشاه اللى خان
ادانه يعنى ثوره
ما تقبلش المناوره
وفضح وكشف عوره
واخر بهدلان
فليه الامن يرضى
يبحبح للمعارضه
دى عالم يابا مرضى
واغلبهم جعان
وهكذا الطريقه
طناش
على الحقيقه
فتبقى الناس
غريقه
وتسمع شقلبان

لهذا
او لذلك
حنمشى فى المسالك
ونطلع م الزمالك
نخش الترجمان
وكلمتنا نقولوها
حليب من بز أبوها
فناسنا يسمعوها
فيحصل بغبغان
فهات ودنك يا خلي
اقولك وانت قوللي
وسيبك م اللي واللي
ونحكى
عن ايران



اصحى يا مصر
اصحى يا مصر
اصحى يا مصر
هزى هلالك
هاتى النصر
كونى يا مصر وعيشي يا مصر
مدي اديكى
وطولى العصر
اصحي وكوني وعيشي يا مصر
اصحى يا عامل مصر يا مجدع
وافهم دورك
ف الوردية
مهما بتتعب
مهما بتصنع
تعبك رايح
للحراميه
جهدك عملك
رزق عبالك
عرقك مرقك
ولا يهنا لك
اصحى يا عا مل
غير حالك
صون المصنع
واصنع مصر
اصحى وكونى وعيشي يا مصر

اصحى يا زارع مصر الخضره
قدره وخضره
ونور وجمال
ابدر غيطك
واحمى البدره
ضد الافه
والاستغلال
ارضك عرضك
باب الدار
صبحوا مداسه
للسمسار
نعطش
ولانشربش عكار
وصفه قالوها الحكما يامصر
اصحى وكونى وعيشي يا مصر

واصحى يا جندى
يا تار الشهدا
عمى وخالك
اختى واخوك
لجل ما تهدا وتارك يهدا
فرغ نارك ف اللى خانوك
يابن الشعب يا حامي الشعب
انت املنا فى يوم الصعب
اصحى يا جندى ودق الكعب
حرر مصر وطهر مصر
اصحى وكوني وعيشي يا مصر

About ahmed gbr

Hi, My Name is Hafeez. I am a webdesigner, blogspot developer and UI designer. I am a certified Themeforest top contributor and popular at JavaScript engineers. We have a team of professinal programmers, developers work together and make unique blogger templates.

0 التعليقات:

إرسال تعليق